Business Man - మహేష్ బాబు సినిమా రివ్యూ

రెండు వేల సినిమా హాళ్ళలో ఒకేసారి విడుదల అంటే పెద్ద ఆశ్చర్యం లేదు. “దీపం ఉండగానే ఇల్లు చక్క బెట్టుకోవాలి”. ఆలస్యం అయ్యి ఆ నోట ఈ నోట విషయం బయటకి తెలిసిపోతే......పెట్టుబడికే మోసం రావచ్చు. నిర్మాతల ఆలోచన అదే కావచ్చు. తప్పులేదు కూడాను.

మహేష్ బాబు: అనుకున్నట్టే అతనే సినిమాకి సర్వస్వం. అతను ఒక్క ఫ్రేము లో లేకున్నా సినిమా పూర్తిగా పోయి ఉండేది. కానీ ఆట గాడు బాగా పరుగెడతాడు అని అతన్ని అదే పనిగా పరుగెత్తిస్తే...కొన్నాళ్ళకి మామూలుగా కూడా నడవలేకుండా పోతాడు అన్న ఆలోచన మన దర్శకులకి ఎందుకు రావటం లేదో? సినిమాలో ఇంకేమి విషయం లేదు .

కాజల్: ఒక హీరోయిన్ కావాలి కాబట్టి ఒక అమ్మాయి నీ పెట్టినట్టు ఉంది, ఆమె రోల్ కట్ చేసి పక్కన పెట్టినా సినిమాకి పెద్ద తేడా ఏమి ఉండేది కాదు.

విలన్: పెద్దగ చెప్పుకోడానికి ఎవ్వరు లేరు ఒక రకంగా అందరు విలన్లే. సరే కాదు కూడడు అని మీరు వాదిస్తే “ప్రకాష్ రాజ్” పేరు మీరు అనుకోవచ్చు. కాని అతన్ని సరిగ్గా వాడుకోలేక పోయాడు పూరీ.

మొదటి భాగం:

టైటిల్స్ బాగా ఉన్నాయి. మంచి గ్రాఫిక్స్ మంచి back ground music for titles. భలే ఉంటుంది సినిమా అనుకుంటాము.

హీరో ముంబాయి వచ్చి తన బిజినెస్స్ మొదలు పెట్టేస్తాడు..అలా మొదలు పెట్టె సన్నీ వేషాలు మరీ వేళాకోళం గా ఉంటాయి. Scenes చూసి అంత convince అవ్వడం కాస్త కష్టం.

మహేష్ బాబు మొదటి సారి కాజల్ నీ కలిసే సన్నివేశం చాలా బాగా తీసాడు పూరీ. పెద్దగా ఏమి విషయం లేకుండా అక్కడక్కడ కాస్త బోర్ గా మొదటి భాగం సాగిపోతుంది......ఎంత సేపు అనుకుంటూ ఉండగా  – దర్శకుడు మనకి Interval ఇస్తాడు.

రెండో భాగం:

అలాగే సాదా సీదాగా సాగుతూ ఉంటుంది..ఉన్నట్టుండి మన హీరో కి ఒక బుల్లి Flash back ఉంది అని గుర్తుకి వస్తుంది – పూరికి . అందులో ఏదో కాస్త పగ అవన్ని కనబడతాయి...అదే మన సినిమాకి అసలు మూల కారణం అట.

రెండో భాగం లో మన పూరీ డైలాగులు అక్కడక్కడ బాగా పేలతాయి. అంతకు మించి నాకు విషయం కనబడలేదు. పొద్దున్న నించి సాయంత్రం దాకా Facebook మీద కూర్చుంటే ఒకటో రెండో మంచి Ctrl C Ctrl V – quotes కనబడతాయి అలానే ఇందులో మంచి కామెడి బిట్లు ఒకటో రెండో ఉంటాయి అంతే.

“రెండు కోట్ల రూపాయల Austin Martin Car ఇస్తే కూడా నువ్వు పడవా? నేనైతే Two wheeler ఇచ్చినా  పడిపోతాను” (హీరోయిన్ పక్కన ఉండే ఒక చెలికత్తె అంటుంది హీరోయిన్ తో)

ధర్మవరపు సుబ్రహ్మణ్యం ది “ దూకుడులో” చాలా పెద్ద రోల్ కింద లెక్క దీనితో పోలిస్తే. ఎందుకు అతన్ని తీసుకున్నారో తెలియదు.

అన్ని పాటలు చిత్రీకరణ చాలా బాగా తీసాడు. “సారోస్తారోస్తారు” పిల్లా Chao” చాలా బాగా తీసాడు పూరీ. మహేష్ అదిరాడు పాటల్లో.

రచ్చ రచ్చ ... గోల గోల చేసిన మహేష్ – కాజల్ liplock scene, so so గా ఉంది. అంత సన్నివేశం అడిగినట్టుగా ఏమి లేదు ..మహేష్ బాబు అడిగినట్టుగానో, లేదా పూరీ కావాలి అన్నట్టుగానో ఉంది, అది కూడా సరిగ్గా లేదు మొహమాటం గా పెట్టుకున్నట్టు ఉంది (దూకుడు కూడా అంతే కదా?)

మొత్తం మీద సినిమా - నాలాంటి “వీర మహేష్ బాబు Fans “ ఒక్కసారి చూడచ్చు. మిగతా వాళ్ళు ఏదైనా TV లో ప్రేమియర్ వచ్చినప్పుడో చూడచ్చు.       

నాకు సంబంధించినంత వరకు రేటింగ్: 3/ 5. ఇంకాస్త తగ్గించినా కూడా వాకే.

రాజన్న (నాగార్జున) తెలుగు సినిమా రివ్యూ

“రాజన్న” – విజయేంద్ర ప్రసాద్ ( S. S. రాజ మౌళి  వాళ్ళ నాన్న) దర్శకత్వం .

సినిమా గురించి: చాలా ఏళ్ళ తర్వాత మరీ గుండెలు పిండేసే సెంటిమెంట్ తో ఉన్న సినిమా చూసాను. మనసుకి చాలా నచ్చింది కాని బయటికి వచ్చిన ఒక అరఘంట దాకా అ బరువెక్కిన గుండె ఇంకా తేలిక పడ లేదు.

మూల కదా వస్తువు, వాళ్ళ ఊరిని (ఆదిలాబాద్ జిల్లా – నేలకొండపల్లి) నీ బాధిస్తున్న నిజాం  తొత్తుల నించి విముక్తి కలిగించమని ఒక 7-8 సంవత్సరాలు వయస్సుకల పిల్ల ..కాలి నడకన డిల్లి నడుచుకుని వెళ్ళి అప్పటి ప్రధాని నెహ్రు గారిని కలవడానికి వెళ్లడం. ఈ పిల్ల మన దివంగత హీరో రాజన్న కూతురు (ఆ విషయం ఆ అమ్మాయికి తెలియదు ముందు)

మొదటి భాగం చాలా బాగా వచ్చింది. మొదటి భాగం హీరోయిన్ - ఒక చిన్న పిల్ల చాలా చాలా బాగా చేసింది. కళ్ళల్లో చక్కటి హావ భావాలు, నవ్వితే చాలా బావుంది అమ్మాయి. తెలంగాణా జానపద గీతాలు, సందర్భానుసారంగా పాటలు చాల బాగా నప్పాయి. కీరవాణి సంగీతం సందర్భోచితంగా చాలా హాయిగా అనిపించింది. కాని ఒక్కటి మళ్ళి గుర్తుకు వచ్చే పాట వినబడలేదు.

ఉన్న కాస్సేపైనా స్నేహ బాగా ఉంది.

ఆ చిన్న పిల్ల పెంపుడు తాత పాత్ర వేసిన నటుడు చాలా బాగా నటించాడు. ఆ పిల్ల - ఈ తాత కలిసి నన్ను చాలా ఏడిపించారు. ఒక రుమాలు పూర్తిగా తడిసిపోయింది. పక్కన కూర్చున్న వాళ్ళు నవ్వుకుంటారేమో అని భయం కాని, కన్నీళ్లు ఆగలేదు, నా system malfunction ఏమో తెలియదు.

రెండో భాగం కాస్త నెమ్మదించింది. అంతా మామూలు గా  విప్లవం, దేశభక్తి మాటలు, తిరుగుబాటు...కత్తులు, తుపాకులు..అన్ని షరా మామూలే. మన నాగార్జున సరిగ్గా మొదటి భాగం చివరిలో మొదటి సారి వస్తాడు...(ఇతని పాత్ర flash back) అతను పోయాకా మళ్ళి మనం వర్తమానం లోకి వస్తాం. మన పిల్ల డిల్లి చేరుకొని అక్కడ కాస్త కష్టం అనుభవించి చివరికి నెహ్రు గారిని తన పాటతో మెప్పించి ..తన ఊరిని నిజాం  తొత్తుల దాస్యం నించి విముక్తి కలిగిస్తుంది.

ఒక్కసారి చూస్తే చూడచ్చు..కాస్త దేశభక్తి గుర్తొస్తుంది. అందరు చాలా బాగా నటించారు. విజయేంద్ర ప్రసాద్ దర్శకత్వం బావుంది. “Action scenes by S. S. Rajamouli” అని build up ఇచ్చినంత ఏమి లేదు సినిమాలో. బహుశా పబ్లిసిటీ కి వాడుకుని ఉండచ్చు. ఫోటోగ్రఫి బావుంది.

అన్నపూర్ణ స్టూడియో వారికి పెట్టుబడి వెనక్కి వచ్చిన రావచ్చు లేదా కాస్తో కూస్తో పోవచ్చు. మొత్తం మీద ఒక మంచి సినిమా చూసా అన్న భావన కలిగింది..కాని మనస్సు మాత్రం చాలా బరువెక్కిపోయింది. (ఒక మంచి బ్రహ్మి కామెడి చూస్తే కాని బరువు దిగదు (ఏదైనా పాత DVD పెట్టి చూసేయ్యాలి రాత్రికి)

రేటింగ్: 2.75/ 5 (3 ఇచ్చిన కూడా పర్వాలేదు)

కలకత్తా ప్రయాణం - అప్పల స్వామి పరిచయం

1984 లో రాజమండ్రి నించి - కలకత్తా వెళ్ళడానికి "కోరమాండల్ ఎక్స్ ప్రెస్ " లో కూర్చున్నా, కిటికీ పక్క సీటు (సైడ్ లోయర్), గుండెల్లో ఏదో తెలియని భయం బిక్కు బిక్కు మంటూ ఉంది. దానిక్కారణం నాకు అస్సలు బెంగాలి రాదు, కలకత్తా లో అంతా బెంగాలీయేనట ! చుట్ట పక్కాలు అంతా తెగ భయపెట్టేసారు.

రైలు సామర్ల కోట వచ్చేసరికి ఒకాయన నా ఎదురుగా వచ్చి కూర్చున్నారు. మనవాడు వస్తూనే సుడిగాలిలా వచ్చేసాడు , అంతా హడావిడి, నన్ను ఒక పక్కకి జరిపెసాడు ..సామాను సర్దేసాడు. కాస్త స్థిమిత పడగానే ఇంక మొదలు:

"మీరెక్కడిదాకా నండి?" చెప్పా "కలకత్తా"..."ఆయ్ నేను అక్కడికే అండి, నా పేరు అప్పలసామండి, ఆయ్ మాది ద్వారపూడండి". ఓహో అనుకున్నా."ఇంతకు ముందు ఎప్పుడైనా ఎల్లారా?" "లేదండి ఇదే మొదటిసారి" ఆహాయ్ పర్లే మంచూరే!! ధైర్యం చెప్పాడు నాకు . "మనకి బెంగాలి యావైనా వచ్చేటండీ"? నాకు కొచ్చిను. అబ్బే లేదండి "అస్సలు" రాదు అన్నా. అలా ఏదో చెపుతూ పోతూ ఉన్నారు నేను వింటూ నిద్రలోకి జారుకున్నా..

తెల్లారి కలకత్తా లో దిగాము .

మనోడే నన్ను గుంజుకుని తీసుకు పోయాడు ఒక హోటల్ కి. మేఘ దూత్ – దానిపేరు.

రూములోకి వెళ్ళి కాస్త స్థిమిత పడ్డాకా....రూమ్ సర్విస్ వాడిని పిలిచాడు మన అప్పల సామి. రూం బోయ్ రాగానే మొదలు మనవాడు: “టిఫిన్ ఏముందయ్యా మన దగ్గిర?” (సుద్ద తూ గొ జీ తెలుగులో) కుర్రాడు చెప్పాడు లిస్టు ..ఇడ్లి, వడ, దోస వగైరా ..”సరే మంచి వేడి వేడిగా రెండు ప్లేట్లు పూరీ పట్రా అని” పంపించేసాడు. నేను చాల ఆనంద పడిపోయా, కాస్తంత ఆశ్చర్యపోయా కూడా . కలకత్తాలో తెలుగు వాళ్ళు పని చేసే హోటల్ ఉందే అని, అదే మాట మా అప్పలస్వామి గారితో కూడా అనేసా.

“తెలుగోడా నా మొహమా “ ఆడు శుద్ద బెంగాలి వోడు ఆదికి తెలుగు రాదండి అన్నాడు. “మరి మీరు వాడితో తెలుగులో మాట్లాడేస్తున్నారు?” అన్నా. “ఓహో అదా మనం ఏమన్నాం అండి? ఒరేయ్ మీ దగ్గిర టిఫిను ఏంటి” యే భాషైన టిఫిను టిఫినే కదా? ఆడు పూరీ అన్నాడు , నేను రెండేళ్లు చూపిచ్చి రెండు ప్లేట్ పూరీ అట్టుకు రా అన్నా....అంతే ఆడికి అర్ధం అయ్యిపోయింది..ఎల్లాడు - మీకు నాకు పూరిలట్టుకొచ్చాడు. దీనికి పెద్ద భాష రావాలేటండి? అన్నాడు. అతని లోక జ్ఞానానికి నాకు నోట మాట రాలేదు.

ఇంత చదువు చదివి, ఇన్ని భాషలు వచ్చి నాకు బెంగాలి రాదు అని భయపడుతున్న నాకు గీతోపదేశం లా చెప్పాడు మా అప్పలస్వామి. అతను ‘నిశాని’ అయినా ఎక్కడ తోణుకు బెణుకు లేదు మనిషిలో, వదిలేస్తే ప్రపంచాన్ని చుట్టేసి రాగలడు.