బ్రహ్మోత్సవం - తెలుగు సినిమా

బ్రహ్మోత్సవం

ఈ మధ్య మన తెలుగు సినిమాల్లో చక్కటి కుటుంబ కధా చిత్రాలు అనగానే... పోలో మని ఒక యాభైమంది జనాల్ని ఒకే ఇంట్లో పోగేసేసి వాళ్లకి కుటుంబం అన్న పేరు పెట్టేసి వాళ్ళకో ఇంటి పెద్ద - ఆయన్ని చూడగానే అందరు లేచి నిన్చోడం , ఆయన్ని చూసేవారి కళ్ళల్లో అమితమైన భయం - భక్తి తొణికిస లాడడం... ఇలా ఇవన్ని ఒక మూసలో పోసినట్టు తయారు చేసేసారు.

అలాగే ఈ సినిమాలో కూడా శ్రీకాంత్ అడ్డాల అదే ఫార్ములా అమలు చేసేసాడు. కాని మన దురదృష్టం ఏమిటి అంటే జనాలు, హడావుడి , కోలాహలం సందడి బావుంది అన్నారు కదా అని అస్తమాను అవే సీన్లు చూపిస్తాం అంటే చిరాకు వేస్తుంది ఒక్కోసారి.

సినిమా మొదలయిన గంటన్నర దాకా ఏమి జరుగుతోందో నాకైతే అస్సలు అర్ధం కాలేదు. ఎవరు ఎవరితో ఎందుకు మాట్లాడుతున్నారో? అసలు ఆ తోరణాలు హడావుడి ఆ కోలాహలం ఎందుకో ఒక్క ముక్క అర్ధం కాలేదు.

ఉన్నట్టుండి ఫారిన్ నించి కాజల్ వస్తుంది. వస్తూనే ఈ పండగల కోలాహలం ఇంట్లోకి వచ్చేస్తుంది. వస్తూనే మహేష్ ని చూసి ఆకర్షితం అవుతుంది ఇద్దరు చెట్టా పట్టా లేసుకుని ఊరంతా (విజయవాడ) తిరుగుతారు. ఉన్నట్టుండి కాజల్ ‘అబ్బే మీ ఇళ్ళు ఈ జనం, ఈ కోలాహల వాతావరణం ఇవన్ని నాకు పడవు అని చెప్పి ఎక్కడికో వెళ్ళిపోతుంది.

అసలు ఎందుకు వచ్చిందో ..ఎందుకు వెళ్లిందో ఒక్క ముక్క అర్ధం కాదు మనకి.

తర్వాత ఉన్నట్టుండి లండన్ నించి సామంత వచ్చేస్తుంది. ఆ అమ్మాయి ఎవర్రా అని ఆరా తీస్తే... లండన్ లో ఉన్న మహేష్ చెల్లెలి ఫ్రెండ్ ట. “తోచీ తోచనమ్మ, తోడికోడలు పుట్టింటికి వెళ్ళింది” అన్నట్టు...అతని చెల్లెలి ఫ్రెండ్ ఆ చెల్లెలు లేకుండా వీళ్ళ ఇంట్లో ఊరికే కొన్నాళ్ళు ఉండిపోదాం అని వచ్చేస్తుంది. గమ్మత్తైన విషయం ఏమిటి అంటే ఆ అమ్మాయి వస్తూ వస్తూ ఒక బస్సెడు జనాల్ని (ఎవరో తెలియని ఊరు జనాల్ని) కూడా ఊరికే సరదాగా మహేష్ ఇంటికి తీసుకు వస్తుంది సరదాగా ఉండి భోజనం చేసి వెళ్తారు అని. అప్పటికి సమంత ఎవరో మహేష్ ఇంట్లో ఎవరికీ తెలియదు. ఇంత బిల్డ్ అప్ ఎందుకురా అంటే...సమంత మనస్తత్వం కూడా నలుగురిని కలుపుకు పోయి, జనాల మధ్య జనం కావాలి అని అనుకునే మనస్తత్వం అని మనకి తెలియచెప్పడానికి ట. (మరీ అంత V P ల్లా కనబడుతున్నామో ఏమిటో?)

మధ్యలో ఆటలో అరటి పండులా ప్రణీత ఒకత్తి... అప్పుడప్పుడు ’బావా, బావా’ అని మహేష్ తో కళ్ళల్లో కళ్ళు పెట్టి తిరుగుతూ ఉంటుంది . తర్వాత పెళ్లి ఇంకెవర్నో చేసుంటుంది అనుకోండి.

సత్యరాజ్ ఉన్నట్టుండి ఎందుకుపోతాడో అర్ధం కాదు.

రావు రమేష్ పాత్ర అలా అస్తమానూ నీరసంగా ఎందుకు ఉంటాడో సరిగ్గా ఎష్టాబ్లిష్ చెయ్యలేకపోయాడు దర్శకుడు. అదేదో పెద్ద భూమి బద్దలయ్యే ఫ్లాష్ బ్యాక్ అనుకుంటాం కాని, చివరికి ఏది ఉండదు.

అన్నిటికన్నా పెద్ద కామెడి ...హీరో వాళ్ళ నాన్న ఎదో నలుగురు...చుట్టాలు.... ఏడు తరాలు అన్నారని హీరో గారూ, సమంతా కలిసి దేశం మీద పడతారు (ఏడూ తరాల జనాల్ని వెతకాలి అని) తల తోకా - తాడూ బొంగరం లేకుండా ఎలా వెతుకారో? అనుకుంటున్నారా... అక్కడే ఉంది ట్విస్ట్.
నాగపూర్, బెంగుళూర్, లక్నో, హరిద్వార్, కాశి ఇలా చాలా ఊళ్ళ బోర్డులు చూపిస్తారు మనకి. ఎవరు ఎవర్నో కలిసేస్తారు, ఎలా కలుస్తారో, ఏమిటో తెలియదు. కాని చివరాఖర్న ప్రణీత పెళ్ళికి అందరు వచ్చేస్తారు మనం అంతా ఒకటే కుటుంబం అని... నాసిర్ పాత్ర ఎందుకో తెలియదు.

అందరు రావ్ రమేష్ ఆదరగోట్టేసాడు అన్నారు కాని నాకైతే అతని పాత్ర చాలా చిరాగ్గా ఒక బేస్ లేకుండా మలిచిన పాత్ర అనిపించింది.

సినిమా మొత్తానికి హైలైట్ వెన్నెల కిషోర్ ఉన్న కాస్త సేపు అంతే.
ఎప్పటిలాగే మహేష్ చాలా అందంగా ఉన్నాడు.

సినిమా కధనం అతుకుల బొంతలా ఉంటుంది. ఎక్కడా తలా తోకా కలవవు. ఎడిటింగ్ చాలా దారుణంగా ఉంది.

నా అనుమానం బహుశా అసలు సినిమా ఒక నాలుగైదు గంటల సినిమాగా తీసి ఉంటారు....చివరికి నిడివి తగ్గించే ప్రయత్నంలో చేతికి తగిలిన ముక్కలు కట్టిరించేయడం లో అలా అతుకుల బొంతలా అయిపోయి ఉండవచ్చు.

పాటలు సో సో గా ఉన్నాయి. కొన్ని పాటలు అయితే అసలు అనవసరం గా పెట్టారు కూడాను.

ఈ సినిమా దెబ్బ నించి .......మహేష్ బాగా కోలుకుని భవిష్యత్తులో మంచి సినిమాలు చెయ్యాలని ప్రార్దిస్తున్నా.

[నోట్: ఈ సినిమా చూసాకా ఎవరికైనా తెగ నచ్చేస్తే నన్ను, నారివ్యూని తిట్టుకోకండి. పుర్రెకో బుద్ధి- జిహ్వకోరుచీ కదా...అలాగే ఇదీను అనుకోండి]

సీతమ్మ వాకిట్లో సిరిమల్లె చెట్టు తెలుగు సినిమా రివ్యూ

చాలా రోజుల తర్వాత తెలుగులో ఒక ‘Socio fantasy’ సినిమా  చూసాను.  ఇలా ఫాంటసీ సినిమా అంటున్నా అని విస్తుపోతున్నారా? నిజమే. ఇందులో ఇప్పటి కాలం సినిమాల్లో వచ్చే ‘ధించ్చాక్ ధించ్చాక్ డప్పు బీట్లు, fights, అరుపులు, కేకలు, పగలు, కుట్రలు కుతంత్రాలు విలనీలు............ఏమి లేవాయే? ఆఖరికి కామెడికి మూసపోసినట్టు ఉండే బ్రహ్మానందం కాని ఎమ్మెస్ నారాయణ కాని లేరాయె? అయినా సరే శ్రీకాంత్ అడ్డాల సినిమా తీసేసాడు అదీ కూడా తెలుగు చిత్ర పరిశ్రమ లో ఉన్న ఇద్దరు అతిపెద్ద హీరోలతో. పోనీ ఊరికేనే తీసిపడేసాడా అనుకుంటే లేదే! అద్దిరి పోయేలా  తీసేసాడు. మనసుకు హాయిగా అనిపించిన సినిమా.

ఈ సినిమా మహేష్ బాబుది, వెంకటేష్ ది అనుకుంటే పొరపాటే.........నా ఉద్దేశం లో ఈ సినిమాలో మీకు అంతర్లీనం గా పూర్తిగా మన ‘రాజోలు పదహారణాల తెలుగమ్మాయి - అంజలి’ కనబడుతుంది. బహుశ అందుకే సినిమా పేరుకూడా ఆమె పాత్ర పేరుమీదే పెట్టారేమో? అంజలి నటించిన పాత్ర పేరు సీత. ఈ అమ్మాయి చాలా చాలా బాగా మంచి ఈజ్ తో నటించింది. సమంత మామూలే కొత్తగా ఏమి లేదు అలాగే నటించింది (అచ్చు దూకుడులో ఉన్నట్టే ఉంది).

పెద్దన్నయ్య గా వెంకటేష్  చాలా  బాగా నటించాడు. అతని చిన్న తమ్ముడిగా మహేష్ చాలా jovial గా నటించాడు. “పెద్దన్నయ్య చాలా అమాయకుడు అయితే చిన్నోడు మాటలతో బూర్లు అల్లేసే రకం”. ఇద్దరు అగ్రశ్రేణి కధా నాయకులకి ఉండాల్సిన ఇగోలు పోటీలు ఇందులో లేకుండా సాదా సీదాగా కధానుసారంగా డైలాగు లు ఉంటాయి, ఆ గొప్పదనం - హీరోలది, దర్శకుడిది. కధా పరంగా పెద్ద కదా ఏమి లేదు సినిమాలో చెప్పుకోడానికి. కధనం మాత్రం బావుంది.పాత్రల ప్రవర్తనకి పెద్దగా పొంతన .....  కారణాలు కనబడకపోయినా చూడ్డానికి చిత్రీకరణ చాలా బావుంది. కొన్ని కొన్ని చోట్ల శ్రీకాంత్ అడ్డాల డైలాగు లు చాల బాగా మంచి అర్ధవంతం గా ఉన్నాయి. నాకైతే ఆ డైలాగు లు కొన్ని  ఎప్పటికి రాసి పెట్టేసుకోవాలి అనిపించింది. (DVD రెలీస్ అయ్యాక కొనుక్కుని రాసుకుంటా- ఇప్పుడు గుర్తు లేవు సరిగ్గా).

వీళ్ళ ఇద్దరు హీరోల తల్లిగా జయసుధ చాలా బాగా ఉంది.తండ్రి గా ప్రకాష్ రాజ్. ఇలాంటివి ఎన్నో వేల పాత్రలు వేసి ఉంటాడు ఆయన. మురళి మోహన్, కోట శ్రీనివాసరావు, వేణు మాధవ్..........వీళ్ళంతా అతిధులు సినిమాలో. తనికెళ్ళ భరణి డి ఒక చిన్నతరహా పాత్ర...........ఆయన కూడా ఎన్నో వందల సార్లు అలాంటి వేషం  వేసి ఉంటాడు. రోహిణి హట్టంగడి వీళ్ళ బామ్మ.

సినిమాని ఇంకాస్త వేగంగా నడిపించి ఉండాల్సింది అనిపించింది. కొన్ని కొన్ని సన్నివేశాలు ముఖ్యంగా మహేష్ – వెంకటేష్ మధ్య ఉన్న ఎమోషనల్ సీన్లు కాస్త కావలసిన దానికన్నా ఎక్కువ సాగ తీశారా అనిపిస్తుంది (అయినా బాగానే ఉన్నాయి పర్వాలేదు). నాకైతే చివరిదాకా వెంకటేష్ కాని మహేష్ బాబు కాని బ్రతుకు తెరువు కోసం ఎంచేస్తుంటారో తెలియలేదు.

భద్రాచలం లో ప్రకాష్ రాజ్ శ్రీరాముల వారి ఉత్సవ విగ్రహాల పల్లకి మోసినప్పుడు నాకైతే కళ్ళమ్మట నీళ్లోచ్చాయి. ఆ సన్నివేశాన్ని చాలా బాగా తీసాడు దర్శకుడు.

పాటలు అన్ని చాలా చాలా బాగా తీసారు. మిక్కి J మేయర్ పాటలు అందించారు. మణిశర్మ back ground score అందించారు. rerecording చాలా వీనుల విందైన సంగీతం తో ఉంటుంది.

నాకైతే సినిమా అంతా అంజలి నటన కనబడింది. ఆమె indirect  గా మహేష్ ని వెంకటేష్ ని కూడా కవర్ చేసేసింది అంటే అతిశయోక్తి కాదేమో?[నా వ్యాఖ్య కొంతమందికి కాస్త ఎగష్ట్రా గా అనిపించినా ప్లీజ్ సర్దుకుపొండి]. దర్శకుడు కొత్త బంగారులోకం లో 'ఎకడా' అని హీరోయిన్ తో పలికిన్చినట్టు ఇందులో అంజలి చేత...అస్తమాను "ఏమో బాబు నాకు అన్ని అలా తెలిసిపోతుంటాయి అంతే" అని ఒక విచిత్రమైన గోదావరి యాసలో చెప్పిస్తాడు. ఇంతకి చెప్పడం మర్చిపోయా...సినిమా అంతా మా గోదావరి జిల్లాల్లోనే తీసారు మాటా యాసా అక్కడిదే కూడా.

మరీ సూపర్ డూపర్ హిట్టు 100 కోట్ల కలెక్షన్ అని చెప్పను కాని ఖచ్చితంగా చాలా ఏళ్ల తర్వాత వచ్చిన ఒక మంచి ఆహ్లాదకరమైన సినిమా అని ఘంటా పధంగా చెప్పగలను. కుటుంబం లో అందరు అంటే భార్యా భర్తా, పిల్లా పీచూ, బామ్మా - తాతా అంతా కలిసికట్టుగా వెళ్లి చూసి రావాల్సిన సినిమా............నిజంగా సంక్రాంతి కుటుంబ చిత్రం. (ఇప్పుడే నా Facebook లో ఒక ఫ్రెండ్ అన్నట్టు ఇది నిజంగా సినిమాకి వెళ్లి వచ్చినట్టు లేదు అలా మన పక్కింట్లోకి కాస్సేపు వెళ్లి కూర్చుని వచ్చినట్టు అనిపించింది) 

Rating 3.75/5